Esta semana houvo na universidade a «Semana de Recepcióm dos Caloiros». Trata-se de umha cheia de actividades que sirvem antes de todo para integrar os novatos -mais comumente chamados «bixos»- entre eles, mas também novatos e veteranos. Umha parte dessas actividades é organizada pola própria universidade, com conferéncias, passeios polo campus, dinámicas de grupo, e cousas polo estilo. Da outra, sóm responsáveis os próprios alunos, ao que popularmente chama-se «trote», e é aí onde por vezes podem ocorrer casos de abuso como os que a miúdo saem nos telejornais.

Bem como a «praxe» das universidades portuguesas, o trote tem por detrás toda umha tradicióm. É mais bem um tipo de burla aceptada de parte dos bixos na que hai marcada umha certa jerarquia, pero na meirande das vezes com um tom de brincadeira. Ainda que a universidade afirme que o trote é proibido (hai até um número ao qual aqueles que se sintam ofendidos podem chamar e interpór umha denúncia), fai vista gorda, já que essas actividades inclusive tenhem lugar dentro da própria universidade. De todos os jeitos, desconheço casos de trote violento ao menos dentro do instituto.

O trote no ICMC é relativamente tranquilo: semelha bastante a umha gincana, e a parte disso, também os fám pedir esmola (o clássico «pedágio») polas ruas da cidade para arrecadar cartos para a cervejada. Como nom me gosta participar desse tipo de cousa, limitei-me a assistí-lo, e veu-me umha moreia de recordos de quando eu também estava ali e figerom-me fazer as mesminhas cousas. Lembro-me também do encanto de poder estar ali onde quigeras depois de esforçar-te em acadá-lo, e que aquilo ainda durou uns quantos meses. É algo que nom cho quita ninguém, ainda que a moitos lhes coste entender.

Persoalmente, nom estou em contra do trote, enquanto este seja saudável e nom violento. Engado mais: o trote, pra mim, foi umha oportunidade de conhecer gente e nom começar a universidade completamente colgado. Por moi intimidante que poida parecer, o trote está intimamente ligado ao acto de entrar na universidade, quase como um rito de passage, e coido que havia continuar. Veteranos, sentidinho! E quem nom queira participar, pois que se quede na casa…

O ano nom sempre começa na mesma data para todo o mundo. Hai quem siga outros calendários diferentes do gregoriano, como é o caso dos chineses. Para outros, o ano nom começa até que voltemos às nossas actividades normais, seja o choio, ou bem no caso de nós estudantes, as aulas. Hoje começa o meu 3º ano na uni, e polo tanto declaro oficialmente começado o -MEU- 2010.